’n Plastiek-Coke-bottel kan saam met ’n rubberspeen, wat by die koöperasie gekoop kan word, gebruik word om die bokkie groot te maak. Steriliseer die bottels ná elke voeding. Middels wat vir bababottels geregistreer is, kan hiervoor gebruik word. Spoel die bottels goed uit voor die volgende voeding.
Die bokkie moet daagliks teen 10% tot 15% van sy liggaamsgewig gevoer word, byvoorbeeld ’n bokkie wat 10 kg weeg kry 1 liter tot 1,5 liter melk per dag. Verdeel die hoeveelheid melk per dag in vier tot ses voedings.
Temperatuur. Dit is belangrik dat die melk elke dag vars aangemaak en in die yskas gebêre word. Meet voor die voeding slegs die hoeveelheid melk vir daardie voeding af.
