Voorstelle om die teel en aanhouding van leeus in Suid-Afrika ’n natuurlike dood te laat sterf, is onlangs op parlementêre vlak bespreek.
Dit is veral die jag van leeus in aanhouding en die uitvoer van leeubeendere vir wins wat onder skoot gekom het in ’n sitting van die portefeuljekomitee van die departement van bosbou, visserye en omgewingsake.
“Suid-Afrika is een van min lande in Afrika waar dit wettig is om roofdiere te teel en aan te hou vir kommersiële doeleindes,” volgens mnr. Tony Gerrans, uitvoerende direkteur van Humane Society International Africa (HSI/Africa). Hy het ’n voorlegging oor die stand van die leeubedryf in Suid-Afrika namens Conservation Action Trust (CAT) gemaak.
