Die veiling, wat jaarliks saam met die Kirkwood-wildsfees in die Oos-Kaap gehou word, is vanjaar by die Mayogi-wildsboma net buite Kirkwood aangebied.
“Die veiling was uitstekend,” sê mnr. Brandon Leer, afslaer van die veiling. “Wat in ons guns getel het, is dat die mark tans baie lewendig is. Daar is ’n groot nasionale tekort aan vlaktewild en jagwild.”
Hy sê dit was wonderlik om so ’n goeie opkoms te sien, ten spyte van die reënerig weer.
Volgens Leer was die pryse vir familiegroepe en algemene wild soos impala, springbok, rooihartebees en blouwildebees almal goed.
Familiegroepe en vroulike diere
“Omdat daar ’n tekort aan jagvoorraad is, het dit druk geplaas op familiegroepe, vroulike diere en troppe. Die troppe moet nou aangevul word en dus betaal mense nou meer.”
Die tekort is veroorsaak deur die droogtetoestande in die Oos-Kaap waar baie diere gevrek het, en Suid-Afrikaanse jagters wat weens covid-19-inperkings eerder hul geld op plaaslike jagtogte as oorsese reise bestee het.
“Ek glo die neiging sal in die volgende twee of meer jare gesien word, veral vir jagdiere. Die familiegroepe se pryse kan afkom, maar die pryse vir jagdiere kan vir ’n ruk stabiel wees.”
Die topprys van R240 000 vir die dag is betaal vir ’n buffelbul van mnr. Gert Loots van Brandfort in die Vrystaat. Leer sê die bul is waarskynlik vir teeldoeleindes aangekoop. Die bul se horings kan nog in die komende jaar of twee tot 48 duim groei.
Mnr. Garth Saville, een van die organiseerders van die veiling, sê altesaam 18 buffelbulle is opgeveil. Dié bulle het die grootste inkomste op die veiling gegenereer.
Leer is ook opgewonde oor die goeie pryse wat vir swartwitpense betaal is.
Jagbedryf doen goed
Volgens Saville doen die jagbedryf tans baie goed met vele internasionale jagters wat op pad is na Suid-Afrika, asook plaaslike jagters wat die bedryf ondersteun.
“Die neiging in die bedryf is om bulle en ramme van enige spesie te koop ter wille van die trofeejagters. Daar is ook telers wat meer toekomsgerig is wat nou teelgroepe aankoop om hulle dan in bestaande troppe te vestig en só trofeediere vir oor ’n paar jaar te teel.”
Saville sê meer as 500 diere is op die veiling aangebied, met meer as 100 geregistreerde kopers, waarvan ongeveer 60 aanlyn geregistreer het. Sowat 60 kopers het die veiling in persoon bygewoon. Die omset van vanjaar se veiling was ongeveer R5,1 miljoen.
