Die volgehoue stryd teen renosterstropers in Suid-Afrika se nasionale parke het volgens me Barbara Creecy, die minister van bosbou, visserye en omgewingsake, in 2022 gelei tot ’n 40%-afname in die getal renosters wat in Krugerwildtuin gestroop is.
Altesaam 124 renosters is verlede jaar in die Krugerwildtuin gestroop en geen renosters in enige ander nasionale park nie, maar, sê die departement, stropers het hul aandag na KwaZulu-Natal verskuif waar daar verlede jaar 244 renosters gestroop is. Van dié renosters is 228 in provinsiale parke gestroop en 16 op private reservate, sê Creecy luidens ’n verklaring.
Sy skryf die sukses in die nasionale parke toe aan ’n suksesvolle onthoorningprogram en samewerking tussen bewaringsowerhede, die polisie, internasionale agentskappe en inkomste-owerhede. Die 448 renosters wat in 2022 gestroop is, is drie minder as in 2021.
