Die jare stap aan, maar groot dr. John Williams (76) staan nog die kombuisdeur vol. Sy breë skouers raak byna weerskante. Hier waar hy teenaan die Limpoporivier boer, geniet hy groot agting in sy gemeenskap en word hy deur ’n ieder en elk as oom John aangespreek – van sy plaaswerkers tot die personeel by die splinternuwe Platjan-grenspos tussen Suid-Afrika en Botswana.
Oral groet mense: “Middag, oom John!” Op sy dag was dié Springbokslot ’n verskrikking op die rugbyveld waar hy teenstanders met die grootste gemak platgeduik en hulle in die lynstane ore aangesit het.
Vandag moet Williams net so vernuftig wees om die grootvoete uit sy landerye en die roofdiere weg van sy vee en wild te hou. Olifante tel onder die probleme wat hy en sy vrou, Mariana, as grensboere moet trotseer op hul plaas, Boelamien, by Platjan, teen die grens met Botswana en sowat 50 km van Alldays.
