As die hoeveelheid navrae oor beskikbare wild vir 2023 se jagseisoen ’n aanduiding is, kan dit ’n goeie jaar vir die wildbedryf wees, sê mnr. Richard York, uitvoerende hoof van Wild-bedryf SA (WRSA).
“Ons is nou in ’n volgende fase van die pryssiklus.” Toe die pryse van lewende wild baie goed was, het boere hoofsaaklik op teling gekonsentreer. Baie boere het egter sedert 2017 die wildbedryf verlaat weens onsekerheid rakende eiendomsreg, droogtetoestande en kommer oor landelike veiligheid.
Teelprojekte is laat vaar en daar was ’n groot aanbod van diere, wat wildspryse afgedwing het. Die wêreldwye covid-19-inperkings wat toeriste en oorsese jagbesoekers se reise in 2020 en 2021 aan bande gelê het, het egter ook nuwe deure oopgemaak.
