Na aanleiding van sy reeks werksessies verlede jaar, “Boer saam met die natuur”, bied die CLT op 8 Maart en 19 April werksessies aan by Bella de Karoo, tussen Calitzdorp en Oudtshoorn. Die trust, in vennootskap met kundiges van die Herding Academy en CapeNature, sal weer werksessies aanbied wat holistiese grondbestuur en volhoubare boerdery in harmonie met roofdiere ondersoek.
Die twee voldagwerksessies sal daarop gemik wees om roofdierkonflikversagting en plaasbestuurmetodes te bevorder wat die natuur beskerm, boere bevoordeel en voedselsekerheid verbeter.
Die eerste werksessie op 8 Maart van 09:00-16:00 sal holistiese droogtebestuur ondersoek. Die tweede werksessie op 19 April van 09:00-16:00 sal holistiese roofdierbestuur ondersoek. Dit kos R200 per werksessie, wat middagete ingesluit. Belangstellendes kan by www.capeleopard.org.za/shop/events plek bespreek.
Die CLT is ’n aktiewe roofdierbewaringswerkgroep. Dit gebruik navorsing as ’n instrument vir bewaring, om oplossings vir konflik tussen mense en wild te vind en om belangstelling in die omgewing aan te wakker deur ’n interaktiewe en dinamiese omgewingsopvoedingsprogram.
“Konflik met roofdiere is een van vele probleme wat boere in die gesig staar, tesame met droogte en uiterste weer. Om saam ‘met’ die natuur te boer is egter nie net moontlik nie, maar voordelig om veerkragtigheid te verbeter en produktiwiteit te verbeter. Boere kort egter soms die kennis of selfvertroue om meer holistiese boerderymetodes aan te neem,” sê die CLT luidens ’n verklaring.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
