Talle bewaringsgesinde grondeienaars, asook die trust vir bedreigde natuurlewe (EWT) is hierby betrokke. Die oogmerk om die sogenoemde Westelike Soutpansberg Natuurreservaat te verklaar is in Desember in ’n kennisgewing in Limpopo se provinsiale koerant afgekondig, tesame met inligting oor sewe ander moontlike reservate in die provinsie.
Luidens ’n verklaring deur die EWT word slegs 2% van die Soutpansberge tans formeel beskerm. Dit is die tuiste van verskeie spesies wat net daar voorkom, en is ook ryk aan kulturele geskiedenis. Die gebied is ’n belangrike wateropvangsgebied en beskik oor talle habitatte.
Die EWT het die Soutpansberg Beskermde Gebiede Program van stapel gestuur om werk te maak van die formele beskerming van genoegsame gedeeltes van die berggebied.
