Twee renoterstropers, die broers Arshandi (34) en Peter (30) Sitha, is verlede week in die Skukuza-streekhof gevonnis nadat hulle skuldig bevind is op aanklagte van betreding, besit van ’n ongelisensieerde vuurwapen waarvan die reeksnommer afgevyl is, die onwettige besit van ammunisie, oortreding van die immigrasiewetgewing, sameswering om misdaad te pleeg en die besit van ’n gevaarlike wapen.
Die twee broers van Mosambiek is op 18 Julie verlede jaar in hegtenis geneem toe veldwagters tydens ’n patrollie in die Krugerwildtuin se Kingfisher-seksie onraad vermoed het. ’n Soektog is begin en later is die hulp van ’n helikopter ingeroep om drie verdagtes op te spoor.
Een van hulle het egter weggekom, maar die Sitha-broers is aangekeer met ’n ongelisensieerde jaggeweer sonder reeksnommers, ammunisie, drie sakke, ’n mes en ’n byl in hul besit. Skukuza se polisie is ontbied en het die twee in hegtenis geneem. Albei broers het met hul eerste hofverskyning reeds skuldig erken op al die aanklagte teen hulle.
Op die klag van betreding in ’n nasionale park is hulle elk tot twee jaar gevangennisstraf gevonnis, vir die oortreding van die immigrasiewet een jaar elk, vir die besit van ’n onwettige vuurwapen ses jaar elk, vir die onwettige besit van ammunisie twee jaar elk, vir die sameswering om misdaad te pleeg vier jaar elk en vir die besit van ’n gevaarlike wapen een jaar elk.
Die hof het gelas dat die vonnisse op klag 1 en klag 2 saam met die vonnis op klag 5 uitgedien moet word. Die vonnis op klag 6 moet op sy eie uitgedien word. Die vonnisse op klag 3 en klag 4 moet saam uitgedien word. Die twee sal effektief 12 jaar agter tralies deurbring.
