Woolworths beweeg weg van verskaffers wat van konvensionele boerdery gebruik maak en beplan om teen 2012 net plaaslik geproduseerde organiese vars produkte en produkte wat volgens sy Farming for the future-benadering gerpoduseer is, te verkoop.
Elemente van dié benadering, wat die beste praktyke vir volhoubare boerdery-, water-, grond- en biodiversiteitsbestuur en verminderde gebruik van anorganiese, kunsmatige insette in ‘n holistiese en meetbare pakket verpak, is nie nuut nie, en word reeds op vele Suid-Afrikaanse plase toegepas. Woolworths het dié benadering saam met die boere wat vars produkte aan hulle lewer, ontwikkel.
Mnr. Simon Susman, hoof uitvoerende beampte, sê die inisiatief kombineer die beste elemente van organiese boerdery en konvensionele boerdery, maar verminder mettertyd die afhanklikheid van gebruiklike metodes, soos roetinebespuitings en –besproeiing. “Ons gaan voort om organiese boerdery te ondersteun, maar ons het besef dat dit nie die enigste volhoubare oplossing is vir die grootskaalse produksie wat ons van produsente vereis nie.”
Hulle beoog om teen 2012 85% van alle vars produkte te verkry van verskaffers wat volgens die Farming for the future-beginsels boer, 6% van organiese verskaffers en 9% van die buiteland. Vars produkte wat plaaslik geproduseer word, maak omtrent 90% van die vars produkte wat in Woolworths verkoop word, uit. Woolworths het 105 boere wat vars produkte regstreeks aan hulle verskaf en 450 boere wat aan die primêre verskaffers lewer.
5 November 2009
