In die lig van die land se steeds stygende wynuitvoere wat die globale afswaai goed trotseer, beplan Wines of South Africa (Wosa) om uit die geweldige buitelandse belangstelling in die 2010 FIFA-wêreldbeker munt te slaan deur joernaliste volgende Junie hierheen te bring om die toernooi te dek en die wynlande te besoek.
Me. Su Birch, Wosa se uitvoerende hoof, sê talle Europese invoerders is ook van plan om hul eie klante met aansporingsprogramme vir die toernooi na Suid-Afrika toe te bring. "Daar was groot belangstelling, veral van die Europese media, om Suid-Afrika vir die toernooi te besoek. Ons wil seker maak dat die besoekende buitelandse handel en media aan ons produsente en bedrywighede in die wynlande blootgestel word terwyl hulle hier vertoef.
"Ons gaan hulle 'n smakie gee van die ware Suid-Afrikaanse gasvryheid waarvoor ons beroemd is. Hulle gaan die spontane Afrika-warmte en opwinding rondom die wedstryde ervaar, en ons wyne in 'n nuwe konteks proe.
"In die lig van die groot opkoms wat vir die toernooi verwag word, het ons besluit om volgende jaar al ons energie op dié gebeurtenis te fokus, in plaas daarvan om ons hulpbronne te verdeel deur drie maande later Cape Wine aan te bied. Dit sal dom wees om te verwag dat kopers só gou weer moet terugkeer, veral as 'n mens die huidige wêreldwye resessie in ag neem.
"Cape Wine, wat elke twee jaar aan die beurt kom, sal weer in 2012 aangebied word, maar intussen sal ons voortgaan om ons wyne na sleutelmarkte toe te neem om seker te maak dat besluitnemers en invloedrykes op die hoogte van ontwikkelings en vernuwings in ons bedryf bly."
5 Junie 2009
