'n Voorste internasionale handelspublikasie met 'n globale reikwydte reken Wines of South Africa (Wosa) as een van die wêreld se mees invloedryke drankorganisasies in die bewusmaking van die publiek van die belangrikheid van die omgewing.
Wosa beklee die vyfde plek - net ná die nuwe Amerikaanse president, Barack Obama - op die sogenaamde "Green List" van The Drinks Business, 'n spesialispublikasie gerig op besluitnemers in die drankbedryf wêreldwyd.
Dié lys, wat pas bekend gemaak is, identifiseer die 50 mees invloedryke maatskappye, individue en organisasies in die drankbedryf wat die beskerming van die omgewing 'n voorkeursaak gemaak het deur hul fokus op aspekte soos hernieubare energie, waterbesparing, koolstofbesoedeling en omgewingsvriendelike verpakking.
Die eerste drie plekke op die lys word gevul deur multinasionale reuse in die kleinhandel - Tesco, Carrefour en Wal-Mart, in daardie volgorde.
Die uitvoerende hoof van WOSA, me. Su Birch, het gesê die erkenning van Suid-Afrika se rol in die bevordering van beste praktyk in volhoubare wynproduksie verbeter verder die land se unieke posisionering as 'n produsent van 'n verbluffende verskeidenheid van wyne wat ons ryke biodiversiteit besing en beskerm.
The Drinks Business swaai Wosa lof toe vir sy rol in die vennootskap tussen die wynbedryf en die bewaringsektor wat as die BWI (Biodiversity and Wine Initiative) bekend staan. Die doel daarvan is om verdere verlies van die land se bedreigde natuurlike habitat tot die minimum te beperk.
"In minder as vier jaar het plaaslike wynprodusente, onder leiding van die BWI, 112 550 ha vir langtermyn-bewaring opsy gesit. Dit is meer as die totale nasionale wingerd van 102 000 ha - en nuwe lede kom deurlopend by en verbind hulle tot die bewaring van verdere gebiede," het Birch gesê.
23 Januarie 2009
