Die Nasionale Landboubemarkingsraad (NLBR) ondersoek tans die moontlikheid om die wynbedryf se statutêre maatreëls te behou en belanghebbendes word genooi om kommentaar te lewer.
Dit volg op ‘n versoek wat deur die wynbedryf aan die Minister van Landbou, Bosbou en Visserye, me. Tina Joemat-Pettersson, gerig is. Die aansoek is deur die Suid-Afrikaanse vereniging vir die eienaars van drank-handelsmerke (Salba), Wynkelders SA (WKSA) en VinPro ingedien. Indien die aansoek slaag sal die voorgestelde maatreëls vir die volgende vier jaar van krag wees.
Die toepassing van die heffings sal deur die SA Wynbedryfinligting en –stelsels (Sawis), Winetech, die SA Wyn- en Spiritualieë-uitvoerdersvereniging (SAWSEA) en Wines of South Africa (Wosa) behartig word. Drie tipes statutêre maatreëls is tans van toepassing op die bedryf. Dit sluit registrasie, rekords en opgawes en heffings in.
Daar word onderskeid tussen vier verskillende tipes heffing getref: ‘n Informasie-, ‘n navorsings-, ‘n uitvoer- en ‘n transformasieheffing. Terwyl die navorsings- en uitvoerheffings matig styg, bly die uitvoer- en transformasies onveranderd.
Indien die heffings aanvaar word, kan die wynbedryf heffings verwag wat soos volg sal lyk:
Druiwe geoormerk vir wynproduksie sal R14,35 per ton aan navorsing moet opdok. Die syfer staan tans op R12,46 per ton. Die informasieheffing staan steeds op R8,75 per ton en transformasie op R2,12 per ton.
Die voorgestelde heffings vir druiwesapkonsentraat wat vir wynproduksie geoormerk is (teen 17,4 grade balling) lyk soos volg: R2,05 per liter aan navorsingsheffing. Tot nou was dit R1,78 per liter. Die informasie- en transformasieheffings bly onderskeidelik op R1,25 en drie sent.
Gedistilleerde wyn en wynspiritus (10% alkohol volume) sal voorts R1,77 per liter moet opdok indien die aansoek slaag. Dit was voorheen R1,54 per liter. Grootmaat drinkwyn se navorsingsheffing sal waarskynlik vanaf R1,78 per liter na R2,05 per liter styg. Die informasie- (R1,25 per liter) en transfomasieheffings (3 sent per liter) bly onveranderd. Die uitvoerheffing styg van R6,39 per liter na R7,60 per liter. Drinkwyne wat verpak sal waarskynlik na R10,45 per liter styg vanaf die huidige R8,77 per liter.
Belanghebbendes word genooi om die NLBR voor of op 23 Oktober te kontak. Alle navrae kan aan me. Mathilda van der Walt van die NLBR gerig word. Haar telefoonnommer is 012 341 1115, haar faksnommer is 012 341 1911 en haar e-pos is mathilda@namc.co.za
6 Oktober 2009
