Die Luka-boetiekwynlandgoed se Sauvignon Blanc het in 20121 ’n silwer Internasionale Michelangelo-prys gekry en verlede jaar ’n dubbelgoud- Vitis Vinifera-prys. Me. Ling Dobson, prinsipaal van Pam Golding Eiendomme in Plettenbergbaai en Knysna wat die 7 hektaar-eiendom bemark het, sê die omgewing word al bekender as wynstreek en het selfs nou ’n wynroete en wynfees.
Volgens Dobson is daar 18 nuwe wynplase wat in die omgewing ontwikkel word, met 50 hektaar wingerd. Sewe van hierdie plase se wyn word in die Bramon-kelder gemaak, wat Pam Golding nou vir R33 miljoen bemark. Dobson sê die plaas beslaan 17,475 hektaar en sy wyne het verskeie pryse gewen. Bramon was die eerste produserende wynplaas so ver oos van die Wes-Kaap en het sy eerste wingerde in 2000 aangeplant. Die landgoed dien as ’n sentrale produksiegerief vir die streek.
Bramon was volgens haar die pionier en dryfkrag agter die streek se wyn- en vonkelwynroete en word ondersteun deur Plettenbergbaai se toerismeorganisasie. Daar is verder ’n drieslaapkamerhuis met ’n swembad met ’n uitsig oor berge en ’n waterval het, ’n tweeslaapkamerhouthuis en ’n eenmanwoonstel. Die eiendom het verder ook ’n restaurant met plek vir 200 mense, ’n proelokaal, twee damme en 700 m rivierfront.
Dobson sê Plettenbergbaai se wynstreek word met dié van Nieu-Seeland vergelyk wat aangaan klimaat- en geografiese eienskappe, asook die styl van wyne wat hier gemaak word. Sy sê verkope van eiendomme in die algemeen in Plettenbergbaai en Knysna toon gesonde groei en die agentskap het met meer as R84 miljoen se verkope van Maart tot Augustus beklink.
Die gemiddelde verkoopsprys was R2,775 miljoen, wat 30% meer is as verlede jaar. Benewens plaaslike kopers, het Kaapse kopers nou hul Gautengse neefs en niggies verbygesteek, terwyl daar ook kopers is uit Duitsland, die Verenigde Arabiese Emirate, Botswana, Swede en Brittanje.
Dobson sê benewens die groei in verkope van residensiële eiendomme, was daar ook ‘n beduidende toename in belangstelling in plase, nywerheids- en kommersiële eiendomme.
Wingerde op die Bramon-wynlandgoed naby Plettenbergbaai. Pam Golding Eiendomme bemark die plaas van 17,475 ha teen R33 miljoen en het onlangs die Luka-boetiekwynplaas vir sowat R7 miljoen verkoop.
