Die internasionale chemiese maatskappy Yara het onlangs die voormalige Yara Western Cape teruggekoop van Farmsecure. Die maatskappy is nou bekend as Yara Cape en lewer diens en produkte in die Wes-Kaap, Oos-Kaap en ’n gedeelte van die Noord-Kaap. Weens ekonomiese omstandighede het die maatskappy besluit om in 2010 uit Suid-Afrikaanse kleinhandel te onttrek. Die hele Suid-Afrikaanse arm is toe aan Farmsecure verkoop wat toe as Kynoch handel gedryf het.
Mnr. Ig Ferreira, algemene bestuurder by Yara Kaap, het gesê dat die maatskappy destyds ’n knou gekry het weens die resessie. Die situasie het egter nou herstel en Yara is nou terug met ’n langermynvisie in die Kaap as deel van sy Afrika- en internasionale strategie. “Ons beplan om infrastruktuur te verbeter, wat die verbetering van aanlegte sal insluit,” het hy by ’n Yara-kliëntedag op Hermon gesê.
Mnr. Egil Hogna, vise-president van Yara Internasionaal, het gesê Yara beplan om baie uit te brei in Afrika vanweë die vasteland se groot groeipotensiaal: “Ons beplan om een van dié grootste landbouchemiese verskaffers in Afrika te word.”
