Vir net R300 het mnr. André Christie-Smith van Kleiheuwel by Bredasdorp ’n skanderingsplatform van vierkantyster en ’n ysterplaatstrook laat bou.
Teen ’n helling van 20 grade en ’n geligte voetstuk kan een werker die skaap hanteer, terwyl ’n veearts die ooi skandeer. Benewens ’n groot saaivertakking het Christie-Smith altyd meer as 5 000 Merino’s op sy plaas, waarvan minstens 1 500 ooie jaarliks in Oktober gedek word.
Minstens een derde van sy skaapboerdery bestaan uit die kweek van wol en nog ’n derde uit skaapvleisproduksie. Om suksesvol en winsgewend met skape te boer, is dit nodig vir ’n boer om presies te weet hoeveel van sy ooie ná paartyd dragtig is en hoeveel meerlinge dra.
