Ondergrondse versuring is ’n groeiende kwessie vir boere wêreldwyd. Dit het ’n ongunstige impak op opbrengs en veroorsaak dat grond nie sy volle potensiaal kan bereik nie. Rula Agri, ’n landbou-ontwikkelings-en-vervaardigingsmaatskappy van Johannesburg, het ná etlike ontwerpe en ontwikkelings met ’n werktuig vorendag gekom wat beloof om dié probleem uit die weg te ruim.
Dit was aanvanklik die landboukundige en voormalige boer dr. Gawie du Toit se geesdrif oor gesonde grond wat tot die ontwerp en ontwikkeling van die Brokkelblaser gelei het, sê mnr. Roelf Odendaal (foto), besturende direkteur van Rula Agri.
Bogrond (tot op ’n diepte van 300 mm) se lae suurvlakke kan taamlik maklik reggestel word as die regte hoeveelheid kalk toegedien en ingewerk word. Dieper as 300 mm is dit moeiliker vanweë die energie wat nodig is om grond met gestrooide kalk te vermeng. Die wind veroorsaak boonop groot verliese met die strooiproses. Du Toit het ’n toestel voorgestel wat deur middel van ’n diep tandbewerking die kalk agter ’n diepwerktoon in ’n pyp afvoer tot op die verlangde gronddiepte.
