Letterlik duisende stuks kleinvee beland op trollies wanneer hulle deur veeartse laparoskopies behandel of wanneer embrio-oorplasings gedoen moet word. ’n Sterk, deeglike ontwerp is daarom onontbeerlik as troppe diere behandel moet word.
Dr. Francois Marais, ’n internasionaal bekende spesialis van die onderneming Ovatec wat jaarliks sowat 1 000 embrio’s spoel en oorplaas, stel hoë vereistes vir die ontwerp van sy trollies. Hy reis die wêreld vol vanaf sy praktyk in Dubbo in die Australiese deelstaat Nieu-Suid-Wallis.
Die trollie-ontwerp wat hy jare gelede verfyn het, word gekenmerk deur ’n stewig geboude pypraam met duursame wiele en ’n behoorlike hegtingstelsel vir die skaap se bene. Die basisraamwerk kan gelig word om die skaap kop na onder en die buik teen ’n hoek van sowat 45º vir die veearts se prosedure bloot te stel. “Daar is uiteenlopende maniere hoe die trollie in die onderskeie ontwerpe in dié posisie bly,” sê Marais.
