Met ’n brandstofprys sonder brieke is daar ook al meer berigte van skelms wat voete maak by vulstasies voor die betaalslag. Twee diefstalvideo’s op Facebook was genoeg om die Bultfontein-boereplanveteraan Michris Janse van Rensburg terug te kry by die sweismasjien.
Deesdae kluister die administrasie en bemarking van sy besigheid hom omtrent 80% van sy werksdag aan die kantoor. Die bestellings uit Afrika vir sy patente gemik op die kleinboer rol in.
Sy sluittoestelplan om die vermeende brandstofdiewe te stuit is ’n T-vormige raamwerk wat om een van die bande gesit word om ’n voertuig te “hok” tot na die betaalslag.
Dit is van U-yster gemaak en bestaan uit ’n U-vorige voetstuk met twee penne weerskante van elke uitsteekpunt wat knus om die wiel pas. Aan die regop staaf waarmee dit rondgeskuif word, is plek vir ’n “vlaggie” waaraan ’n gevaarteken aangebring kan word, wat die motoris waarsku dat ontduikers van die peperduur brandstof geen genade kan verwag nie.
“Ek het dit sommer gemaak van yster wat in my fabriek rondstaan. Omdat my tyd vir maak deesdae min is, was dit lekker om ’n slag weer iets aanmekaar te sweis.”
Gepols oor hoe sy planmakerkop werk, sê hy hy slaap byna nooit. “My beste dinktyd is tussen twee- en vyfuur in die oggend, want ek het dan niks anders om te doen nie! Dit is dalk ’n soort siekte, want om ’n kreatiewe brein te hê, is nie altyd maklik nie. Soms voel dit of jou kop wil bars. Deur die jare, en soos mense my vra vir oplossings, het dit ál makliker geraak om ’n geleentheid raak te sien.”
Janse van Rensburg sê hy teken niks vooraf nie. “Ek het die gawe ontwikkel om alles haarfyn te visualiseer – van die maakproses tot die toepassing – en as ek tevrede is dat dit gaan werk, begin ek eers bou.”
“Eintlik is dit ’n lawwe plan – ek het nog nie verkoop nie, maar ek het ’n navraag gekry. Dit is eintlik jammer, maar mens moet al meer in die rigting dink van misdaadbestryding. Die meeste garage-eienaars het seker ’n sweismasjien, en hulle kan dit sommer self gou bou.”
Die “moeder van alle inperkingsplanne” was sy seun, Jedri, se handreinigervoetpompe wat reg aan die begin van die streng inperking gestalte gekry het. “Maar die draadtrekker, wat ons ook uit nood gebou het om gedurende die inperking aan die lewe te bly, het een my beste verkopers nóg geword. Die mark het nog nooit versadig geraak nie en ons bou byna elke dag een.” Lees op Landbou.com meer oor dié draadspantoestel, wat ook voorop ’n vorige uitgawe van Boereplanne verskyn het.
Al is dit ’n “lawwe plan”, glo Janse van Rensburg dit is ’n stap in die regte rigting. “Vir ’n desperate petroljoggie wat onder geweldige druk werk en oor wie se kop die swaard van niebetalers hang, kan dit darem ’n bietjie meer sekerheid gee.”
Intussen werk sy onrustige kop oortyd, veral in die rigting van misdaadbestryding. “Die boereplanne van die toekoms gaan wees om kabeldiefstal, motordiefstal, boorgat- en spilpuntonderdele te fnuik. Watter boereplan gaan transitorowers keer? Ek sien al hoe ’n mens ’n graad gaan kry in misdaadvoorkoming in Suid-Afrika.”
