Sonkrag is kragtig, maar die meeste statiese panele benut nie ’n volle dag se opwekkingsvermoë nie. ’n Kantelraamwerk van meestal bestaande materiaal rig panele ten volle na die son en verseker twee tot vier uur bykomende opwekking per dag – en ’n veel laer Eskomrekening.
Die besproeiings-en-kleinveeboer mnr. Fanie Lerm van die plaas Wilgerivier by Ladismith boer al die afgelope ses jaar aan die voetheuwels van die Swartberge, naby die Anysberg-natuurreservaat.
Hy en sy vrou, Antoinette, het voorheen by Kakamas op die plaas Middelpos met Damaras geboer, waar hul seun, Faan, nou die leisels vashou. Kort nadat hulle die nuwe plaas gekoop het, het hulle sonpanele aangebring om die huis en boerderybedrywighede van krag te help voorsien, veral nuttig as Eskom se krag onderbreek word. In die lig van die jongste skerp prysstygings maak dit nog meer sin.
