Boere in die plaaslike munisipaliteit Kai! Garib in die Noord-Kaap het reeds minstens R1,6 miljoen bestee om te keer dat hul druiwe-oestyd deur vloedwater van die Benede-Oranjerivier ontwrig word. Daar word ook hard gewerk om te keer dat die N14 by Kakamas oorstroom. As die ekonomies belangrike roete sou oorstroom of wegspoel, sal dit nie net 'n verwoestende uitwerking op die boere en hul werkers in die omgewing hê nie, maar ook 'n rimpeleffek op ander ondernemings, toerisme en inwoners ver oor die Noord-Kaap hê.
Landbou.com het sedert 2021 berig dat dele van die Benede-Oranjerivier by verskeie geleenthede oorstroom het. Sedert November 2022 is die rivier baie vol weens swaar somerreën in in die opvangsgebied van die Vaal- en Oranjerivier, en langs die rivier se middelste gedeeltes.
