As vyfdegeslagboer wat saam met sy broer vier vertakkings oor 4 000 ha bestuur, is daar min probleme wat hulle nog nie op die plaas Grashoek van mnr. Pieter du Toit voorgedoen het nie.
Sy vreet- en waterkrippe uit uitgediende perlemoenteelbakke het hom verlede jaar die eerste prys besorg in die ope afdeling van Landbouweekblad en Omnia se boereplankompetisie op Nampo Kaap. Dié innoverende graanboer van Bredasdorp sien feitlik enige artikel as ’n geleentheid om dit in iets prakties en bruikbaar te omskep.
“Ons kan nie vir enigiets in die bakkie spring en dit ten duurste gaan koop nie. Dit het my van jongs af bedag gemaak daarop om bruikbare goed self te maak. Ek beraam eintlik my lewe lank planne.
