Sonkrag is kragtig, maar die meeste statiese panele benut nie ’n volle dag se opwekkingsvermoë nie. ’n Kantelraamwerk van meestal bestaande materiaal rig panele ten volle na die son en verseker twee tot vier uur bykomende opwekking per dag – en ’n veel laer Eskomrekening.
Die besproeiings-en-kleinveeboer mnr. Fanie Lerm boer die afgelope ses jaar op die plaas Wilgerivier by Ladismith. Hy en sy vrou, Antoinette, het voorheen op Middelpos by Kakamas met Damaras geboer, waar hul seun, Faan, nou die leisels hou.
Kort nadat hulle die nuwe plaas gekoop het, het hulle sonpanele aangebring om die huis en boerderybedrywighede van krag te help voorsien.
