Ons het ’n boorgat op ons plaasgrens wat geleë is naby aan ons buurman se kant waar heelwat Prosopis-bome groei. Die buurman het deur middel van staatshulp ’n paar jaar gelede die eerste gedeelte naaste aan ons boorgat skoongemaak van dié bome, maar dit nie daarna onderhou en bly beheer nie. Daar is nou weer 'n magdom jong bome en bosse en die ander gedeelte waaraan niks gedoen was nie, is nog meer toegegroei. Ons bestry die bome op ons plaas amper weekliks en het honderde suksesvol uitgeroei, maar dit bly op ons bestuursplan, aangesien die bome bly opkom. My vraag is: Wie is verantwoordelik om die indringers te bestry en te beheer? Is dit elke plaaseienaar se verantwoordelikheid of is dit die staat se plig? Dieselfde buurman het ons genader om ander plaas ’n serwituut te gee sodat hy deur middal van ’n pyplyn water kan kry vir die plaas waarop die Prosopis-bome is. Dit maak my baie bekommerd, want natuurlik sal ons toestemming gee, maar aan die ander kant bedreig die bome ons waterbron. Ek sal dit waardeer indien jy my kan help met meer inligting oor die verantwoordelikheid en verpligtinge van die plaaseienaar mbt die bestryding van die indringerbome en miskien ook waar ons om hulp kan aanklop om ons buurman en onsself te help met hierdie probleem.