Beukes neem tyd af vir die geboorte van haar tweede kind. Benewens die versorging van haar kinders sal sy haar besig hou met stemwerk, toneelspel en ander aanbiedingswerk.
Sy vertel die landbousektor het ’n spesiale plek in haar hart en dat sy dankbaar is vir die insig in dié sektor wat sy deur die program kon kry.
“Wat my betref, versinnebeeld Suid-Afrikaanse boere inspirasie. Hulle is aanhouers, uithouers en planmakers. Op die oomblik laat my swangerskap my nie toe om die plaaspaaie aan te durf nie. Gelukkig kan Elma oorneem. Sy het al verskeie stofpaaie op haar kerfstok.”
Boere sal Postma nie net herken as Dezi Terreblanche van 7de Laannie, maar ook as aanbieder van Boer soek ’n Vrou, waarvan sy vir die eerste vier seisoene die aanbieder was, en VIA se Plaaskombuis. Sy is nou weer gereed om die lang pad aan te durf vir Landbouweekliks.
Elma se oupa was ’n boer in Noordwes. As kind het sy dikwels op die plaas gekuier. Van kleins af lê die natuur en boer-wees haar na aan die hart.
Skakel Dinsdae om 19:30 in vir nuwe episodes van Landbouweekliks, en Donderdae om 18:30 en Sondae om 17:00 vir die heruitsendings
