Die meeste wynplase in die land probeer juis dít regkry, met van musiek tot perde, opvoeding en sopkombuise.
Wyle Elspeth Jack was nie net ’n begaafde musikant nie, maar sy was ook oortuig van die krag van musiek om mense te genees. Toe sy dus in 1999 na haar seun, wynmaker Bruce Jack, se plaas in die Overbergse hoogland digby Napier trek, het sy haar passie vir musiek met haar belangstelling in mense gekombineer en gratis vir talentvolle plaaskinders begin musieklesse gee.
“Baie van daardie kinders werk nou as musikante reg oor Suid-Afrika. Sy laat dus ’n on- gelooflike nalatenskap. Sy was ’n briljante musiekonderwyser,” het Bruce tydens Cape Wine, ’n wynhandelskou in Kaapstad, vertel.
