Wanneer jy in die Negosie Museum naby die Champagne-sportoord instap, word jy oorrompel deur Sandra Lemmer se geesdrif. Sy gesels entoesiasties oor die winkel met voorraad vanuit die 1960’s, asook die herkoms en geskiedenis van die verskeie artikels.
Met die eerste blik binne probeer jy konsentreer op die versameling artikels in hierdie mengelmoeskardoes. Die rakke is gevul met van ou Nestlé-blikke, verseëlde lekkers en lucky packets van jou kinderjare, tot rolle flennielap met ’n blommetjiespatroon, knope, lapsakdoeke, klere en selfs korsette nog verseël in die oorspronklike kartonverpakking.
Daar is ook katalogusse vir saadaankope en pakkies groentesaad wat jy destyds kon koop. Dit is byna soos ’n hedendaagse samevoeging van Agrimark, Pick n Pay, Dischem en Build It in een. Alles hier neem jou terug na vervloë tye, jou kinder- en grootwordjare. Dalk het jy ook as kind in soortgelyke winkels rondgedwaal.
