Ek maak sierskousterte vir Amerikaanse Saalperde wat aan skoue deelneem. Ek maak die boonste deel van die skoustert, die sogenoemde toptails, asook die onderste deel, die switches.
Die meeste kliënte stuur hul eie perdehare waarvan ek dan die skoustert volgens hul versoek maak. Wat ek vir hulle maak, hang af van wat die kliënt benodig.
Ek het in 2007 op ’n perdeplaas naby Petrusburg gebly waar ’n vriend van my, Paul Coetzer van Paul Coetzer-perdestalle, perde vir skoue afgerig het. Dit het soms gebeur dat van die skouperde ’n sierstert vir ’n komende of spesifieke skou nodig gehad het.
