Volgens jaarlikse opnames, wat sedert 1998 gedoen word, word daar nog net sowat 1 800 van hierdie bedreigde groen voëls met hul goudbruin koppe in dele in die inheemse woude in die Oos-Kaap, KwaZulu-Natal en Limpopo aangetref.
Die voëls is gewoonlik te sien waar hulle in swerms oor dié woude vlieg. Wyfies het tipies ’n rooi kol bokant hul bek, maar die mannetjies nie. Die afkap van groot hardehoutbome in die inheemse woude is ’n groot bedreiging vir die voëls se voortbestaan omdat daar in die proses ál minder plek vir hulle is om nes te maak en te oorleef.
Van hul gunstelingkosse is die vrugte van inheemse geelhoutbome. Die verspreiding van ’n soort bek-en-veersiekte kan ook dodelik vir die papegaaie wees.
