Ek het die mooiste herinneringe aan die winter uit my kinderdae. Familie en vriende wat gedurende die lang vakansie op die plaas kom kuier het. Bedags het die mans gaan jag en die vroue het buite om ’n tafel gesit met handewerk.
Tee gedrink. Tussendeur is daar konfyt gekook. Resepte is uitgeruil en nuwes probeer. Ek onthou die spesiale ontbyte met spek en eiers. Tasty Wheat-pap, gekook met melk. Ma was altyd netjies. Goeie beplanning is vooraf gedoen. Geregte is in die vrieskas opgestapel.
In my hoërskooljare was ek die meeste dae saam met my pa in die veld. Saans het ons met die huistake gehelp. Bed-opmaak was veronderstel om die maklikste te wees. Vandag kan ek dit nie glo nie, maar ons was nie so presies soos Ma nie. Ons het net die taak afgehandel soos twee stout kinders.
