Hoe lank was die uitsien na die vakansie, maar skielik is alles verby en die lewe jaag weer voort. Ek dink daar kom ’n tyd in ’n mens se lewe dat jy al jou kinderherinneringe herleef.
Die grendeljare is nou iets van die verlede, maar tog het ons baie daaruit geleer. Miskien was dit net om jouself weer te gaan soek en die lewe te leef. Ons was bevoorreg om ’n paar dae langs die see te rus.
Tydens my rustige uitkyk op die branders het die soutreuk my herinner aan die tyd toe ons plaasjapies Desember karavaanvakansies by die see gehad het. Die dag as Pa die karavaan uit die skuur stoot, het almal in ’n ander rat begin werk. Dit was asof die opgewondenheid sigbaar was in almal se stappie.
