Jare gelede het my ma ’n vriendin gehad wat altyd gesê dat sy alles oppak op 1 Desember. Dit is haar vakansiemaand. Van- dag het ek daardie gevoel, hoewel ek dit nie kan doen nie.
Oral is ek bewus van mense wat begin gereedmaak vir vakansie. Daar is die gelukkiges wat vakansie kan hou en die minder gelukkiges wat moet aanhou werk. Maar vir talle boere is dit ’n lang vakansie. Egter nie sonder bekommernisse nie.
Wanneer beurtkrag ons onverhoeds betrap en die gasstofie oorverdowend sy warm asem uitblaas, is my gedagtes terug by die boere se seevakansie. Daardie eerste aand by die see in die woonwa was dit die einste gasstofie se geblaas wat ons laat besef het dat ons met vakansie is. Dit was die jare voor kragpunte.
