Jy sal dalk Meatmaster-bloed in haar boerdery-are vind, maar dit is die miniatuurdonkie wat Angelique du Preez se hart vinnig laat klop. Sy boer al sowat drie jaar met Mediterreense miniatuurdonkies op La Rochelle, hul familieplaas naby Venterstad in die Oos-Kaap.
Haar pa, Clynton Collett, is ’n bekroonde Meatmaster-boer, en saam met haar man, Mario, is hulle mede-aandeelhouers in Collett Farming CC, wat ook kommersiële Boran-beeste as vertakking het.
Dié skaars ras (Equus asinus domestic miniature) is volgens verskeie bronne vandag byna uitgesterf in die Mediterreense eilande Sardinië en Sicilië, waar hulle oorspronklik vandaan kom.
