Vanweë ’n sameloop van omstandighede, hoofsaaklik die sukkelende ekonomie wat nog aan 'n covid-19-babelas ly, het ons die pad platteland toe gevat. Ons eerste oorslaapplek lewer toe die beste storie op.
Die Sondag ná die troue het ons inderhaas al die geskenke en ons bagasie in my Ford Figo gegooi. Met ons aankoms op Barrydale, wat locals blykbaar ’n drinkdorp met ’n landbouprobleem noem, het ons ’n draai deur die dorp gery. Dit het gelukkig nie te lank geduur nie, want toe skop die nadors in en is ons gereed vir die volgende partytjie.
Die Dungbeetle Bar op Barrydale se backpackers was gelukkig nog oop en ons het ons beste gedoen om ’n duik in die bier- en jenewer-voorraad te maak. Ongelukkig maak die kroeg 20:00 toe. Die eienaar van die backpackers het voor die tyd gereël dat daar vir ons ’n bottel borrels gegee moet word voor ons kamer toe gaan.
