Dit is presies wat kykers kan verwag in kykNET se splinternuwe realiteitsreeks, Plaasjapie, wat Donderdag 14 Julie om 20:00 op DStv Premium kanaal 144 afskop.
Ewan Strydom, van Bravo!-faam, is die aanbieder wat ’n groep van 18 stadsjapies en dorpmense – met geen plaas- en boerervaring nie – aanspoor om vir ’n maand lank in ’n skuur op ’n plaas te lewe en te werk, nes boere van ouds.
Die vervaardiger, Albert Snyman, sê Plaasjapie is ’n nuwe formaat wat nie die tradisionele realiteitstelevisie-resepte volg van deelnemers uitstem nie, en dat kykers baie sports van die program kan verwag. “Ons het regtig wonderlike deelnemers gehad en dit was fassinerend om te sien hoe al hul vriendskappe ontwikkel terwyl hulle aanpas by die lewe op hul plaas,” sê hy.
Die produksie het nie sonder uitdagings gekom nie. Dis vier keer uitgestel danksy die verskillende vlae van die Covid-pandemie en toe die kameras uiteindelik begin rol, het hulle op sommige dae oorverhit as gevolg van temperature in die 40s. Nietemin het die deelnemers hulself met oorgawe aan die kompetisie oorgegee.
“Jy sien letterlik hoe mense wat amper nog nooit ‘n skaap in lewende lywe gesien het nie, met die skaap begin werk. Die uitdagings waar hulle teen mekaar kompeteer was vir ons baie opwindend om na te kyk. Jy skrik nogal as jy sien hoe al die deelnemers vreesloos uithaal en wys. Maar die mooiste is om te sien hoe die mense wat die langste op die plaas bly, begin verlief raak op die eenvoudige lewe op die plaas,” sê Albert.
Van Ewan Strydom as aanbieder skerts Albert: “Ewan is ’n nagmerrie. Hy is aantreklik, talentvol en die niceste mens wat jy ooit sal ontmoet. Hy laat die res van ons mans almal sleg lyk. Jy wil net nie langs hom staan in ’n vertrek nie.”
Plaasjapie begin Donderdag, 14 Julie om 20:00 op kykNET, kanaal 144 op DStv Premium. Maak seker jy loop dit nie mis nie!
