Die koms van die binnebrandenjin het gelei tot die vinnige ontwikkeling van die motor. Dié doeltreffende kragbron het baie gou toepassing in die landbou gevind. ’n Paar motorvervaardigers het ook die landbou op die proef gestel. Selfs Citroën, Alfa Romeo en Austin was op ’n tyd met trekkers deurmekaar.
Baie van Citroën se vernuwende ontwerpe is bekend. Die opsigtelikste motor was Citroën se ID- en DS-modelle wat 65 jaar gelede op die mark gekom het. Citroën was ook die wêreld voor met die eerste massavervaardigde voorwielaangedrewe motor, die 4CV. Bitter min is egter bekend oor die twee Citroën-trekkers.
André Citroën het sy maatskappy in 1919 gestig en in daardie jaar ’n motor en ’n trekkertjie vervaardig en bemark. Die trekkertjie was maar ’n tingerige dingetjie op staalwiele, bedoel om wingerd te bewerk wat vir ’n eenperdploegie aangeplant is. Die trekkertjie het 800 kg geweeg. Net sowat 500 is verkoop in die twee jaar dat dit vervaardig is.
