Christine Goosen, ’n nooi Jacobs, het as die jongste van vyf dogters op die skaapplaas Touwfontein naby Trompsburg in die Vrystaat grootgeword waar haar pa, PD Jacobs, en haar swaer, Willem Grobbelaar, die Pdrino-stoetery, een van Suid-Afrika se voorste Merino-stoeterye, bestuur.
Goosen, wat steeds as kunstenaar onder haar nooiensvan as Christine Jacobs werk, skep meubels en kontemporêre kuns waar sy, buiten haar verbintenis met die plaas, onder meer ook van die fynwol van haar geboorteplaas in sekere stukke inspan.
Sy het ’n graad in beeldende kuns in 2014 aan die Universiteit Stellenbosch verwerf, met omgewingsverhoudinge wat dien as inspirasie vir haar kuns. Christine het in 2016 haar Jacobs Collection, met verskeie meubelstukke, van stapel gestuur.
