Vulsel
- 8-10 vars appels, geskil en in kwarte gesny
- 125-150 ml water
- 250-375 ml suiker (of ekstra na smaak)
- 2 kaneelstokkies
- Fyngerasperde skil van 1 suurlemoen
- 30 ml suurlemoensap
Broskors (shortcrust pastry)
- 500 ml koekmeel
- 2 ml sout
- 250 g botter of margarien (geskik vir bakdoeleindes)
- 1 eiergeel
- 15 ml wit asyn
- 45 ml yswater
Vir soet kors: 30 ml strooisuiker Vulsel: Plaas al die bestanddele in ’n groot kastrol en verhit oor mediumhitte. Laat kook tot die appels effe sag en die sous verdik is. Wees versigtig vir té hoë hitte, aangesien dit maklik aanbrand. Verwyder van die hitte en laat afkoel. Sny die stukkies appel effens kleiner indien nodig en gebruik as vulsel vir appeltert.
Kors: Plaas alle droë bestanddele in die bak van ’n voedselverwerker. Sny die botter of margarien in blokkies en voeg by die droë bestanddele. Skakel die voedselverwerker aan en meng tot fyn krummels vorm. Klits die eiergeel saam met asyn en water in ’n klein bakkie en gooi oor die droë bestanddele in die bak van die voedselverwerker.
Gebruik die pols-aksie van die masjien om die bestanddele te meng tot growwe krummels vorm wat net-net bymekaarkom. As daar nog ’n paar los krummels is, laat dit eerder net so. Pasop vir te veel meng. Plaas die deeg (en los krummels) in ’n plastieksak en druk bymekaar om ’n reghoek te vorm).
Plaas die sakkie met deeg in die yskas vir 30 minute. Voorverhit die oond tot 180 °C. Verdeel die deeg in twee dele. Rol die een helfte uit om in die boom van ’n reghoekige, vuurvaste bak (ongeveer 22 x 30 cm) te pas. Versprei die voorbereide appelstukke oor die deegbasis om ’n egalige laag te vorm.
Gebruik die growwe kant van ’n rasper om die orige helfte van die koue deeg oor die appels te rasper en ’n los, krummelrige laag te vorm. Bak vir 1 uur.
