Vulsel
1 groot botterskorsie, geskil, ontpit en in blokkies gesny
45 ml olyfolie
15 ml fyn komyn
3 ml neutmuskaat
Sout en vars gemaalde swartpeper na smaak
500 ml water
250 ml room
1 x 500 g pak lasagnevelle
2 wiele fetakaas, gekrummel
Melk
Braai die blokkies botterskorsie vir vyf minute in olyfolie. Voeg die komyn by en braai tot geurig. Voeg die neutmuskaat, sout en peper na smaak by en braai vir ’n paar minute. Voeg die water by en verhit tot kookpunt. Kook vinnig tot die botterskorsie baie sag en daar nog net ’n bietjie vloeistof in die kastrol oor is. Druk die botterskorsie fyn tot ’n pulp en roer 160 ml van die room deur. Die mengsel moet soos dik vla lyk, nie te droog en styf nie. Smeer ’n oondpan van 20 cm x 20 cm met ’n bietjie olie of gesmelte botter en pak ’n enkellaag lasagnevelle daarin. Breek die velle en pak tot die boom van die pan bedek is. Skep ’n lagie botterskorsievulsel daaroor, gevolg deur nóg ’n laag lasagnevelle. Herhaal die proses en eindig met ’n lagie lasagnevelle. Meng die fetakaas en orige room met ’n klein bietjie melk en skep bo-op. Laat staan eenkant terwyl jy die oond tot 190 °C voorverhit. Bak die lasagne vir 30 minute tot deurgaar en borrelend. Maal swartpeper oor. Sit die lasagna voor met basilie-pesto en ’n vars slaai. Lewer vier porsies.
