- 350 g stoweskaapvleis, in stukkies gesny (ek gebruik graag rib)
- Sout en vars gemaalde swartpeper
- 30 ml olie
- 2 uie, grof gekap
- 5 ml gemaalde koljander
- Water
- 4 aartappels, geskil en in kwarte gesny
- 400 g groenbone, skoongemaak en gekerf
- Skeut vars suurlemoensap
Geur die vleis met sout en peper en braai dit bruin in die olie in ’n swaarboomkastrol. Voeg die uie en koljander by en braai dit saam met die vleis vir ongeveer 3 minute, of tot die uie begin sag word. Voeg genoeg water by om die vleis heeltemal te bedek.
Verhit tot kookpunt, draai die stoofplaat laag en prut die vleis stadig vir sowat 90 minute, of tot die vleis sag is. (Kyk dat daar deurentyd genoeg vloeistof in die kastrol is.) Voeg die aartappels en boontjies by en geur liggies met sout en peper, maar moenie roer nie.
Verhit weer tot kookpunt, bedek die kastrol en prut vir 30-40 minute tot die aartappels en boontjies gaar is. Gee nou eers die bredie ’n roer, geur na smaak, en laat prut vir ’n verdere 10-15 minute. Rond af met ’n skeut vars suurlemoensap.
Lewer 4-6 porsies
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
