Vergeet van gekoopte sop of ’n flou verskoning uit ’n pakkie waarby jy net kookwater gooi! Hierdie sop is een van die maklikste resepte wat jy jou kan voorstel, maar dit is absoluut heerlik. As jy nie ’n staafmenger het nie, verpulp die sop met ’n aartappeldrukker.
1 x 250 g pak spekvleis, gesnipper (as jy sukkel, knip dit met ’n kombuisskêr in stukkies)
4 patats, geskil en in klein blokkies gesny
1 middelslag-botterskorsie, geskil en in blokkies gesny
1,5 liter kookwater of hoenderaftreksel (of groente-aftreksel)
125 ml room
Sout en vars gemaalde swartpeper na smaak
Braai die spek in ’n groot kastrol tot gaar. Voeg die patat- en botterskorsieblokkies by. Hoe kleiner die blokkies, hoe vinniger kook die sop gaar. Braai vir 2 minute.
Voeg die water of aftreksel by. Verhit tot kookpunt en kook tot die patat en botterskorsie gaar is. Verpulp tot glad, roer die room deur en geur met sout en swartpeper. Lewer 4-6 porsies.
