Sorbet is lig en na gelang van die vrugte wat jy gebruik, bevat dit min of geen vet nie. Gebruik enige bessies waarvan jy hou. Ons het aarbeie en frambose gebruik.
250 ml suiker
250 ml water
600 g somerbessies, skoongemaak
Verhit die suiker en water tot die suiker opgelos is. Verhoog die hitte en verhit tot kookpunt. Verwyder van die hitte en laat tot kamertemperatuur afkoel. Verkoel tot nodig. Verwerk die bessies en koue suikerstroop in ’n voedselverwerker tot glad. Giet deur ’n fyn sif om van pitjies en soliede stukkies vrugte ontslae te raak. Giet in ’n geskikte bak, bedek en vries vir 2-3 uur. Skep die mengsel uit in ’n voedselverwerker en pols weer tot glad. (Dié proses breek die growwe yskristalle op en verseker dat die sorbet ’n fluweelgladde tekstuur het.) Skep weer in ’n geskikte houer, bedek en vries tot benodig. Vries sorbet vir tot twee weke. Lewer 750 ml sorbet.
