6 hoenderdye, met vel en been
Sout en hoenderspeserye na smaak
45 ml olyfolie
1 groot ui, in dun wiggies gesny
3 knoffelhuisies, fyngekap
100 ml tamatiesous
100 ml blatjang
45 ml sojasous
250 ml water
Sout, varsgemaalde swartpeper en ’n knippie suiker na smaak
Gekapte vars kruie soos pietersielie, koljander of tiemie na smaak
Voorverhit die oond tot 180 °C. Geur die hoenderdye met sout en hoenderspeserye. Verhit die olie in ’n pan en braai die hoender daarin tot bruin. Skep die hoenderporsies in ’n oondbak met die velkant na bo. In dieselfde pan waarin die hoender gebraai is, braai die ui tot dit sag begin word.
Voeg die knoffel by en braai tot geurig. Voeg die tamatiesous, blatjang, sojasous en water by. Verhit die sous tot kookpunt en prut vir 5-10 minute. Proe en geur na smaak met sout, peper en dalk ’n knippie suiker.
Giet die sous oor die hoender en bedek met foelie. Bak vir 30 minute, haal die foelie af en bak vir ’n verdere 30 minute tot die hoender deurgaar en goudbruin is. Sprinkel die kruie oor en sit dadelik voor.
Lewer 3-6 porsies.
