Op The Oaks word met beeste geboer, maar ook met appels en pere. Marianne Ehlers en haar skoondogter Lize-Marie, kook en bak graag met wat op die plaas verbou word. Dié appeltert, ’n resep van Marianne se suster, Salomé Teuteberg, word gereeld vir vriende en familie gemaak.
Deeg
- 180 g botter
- 125 ml suiker
- 2 ekstragroot eiergele
- 500 ml koekmeel
- 10 ml bakpoeier
- Knippie sout
Vulsel
- 4-5 appels, geskil, ontkern en in wiggies gesny
- 15 ml suiker
- 5 ml kaneel
- 100 g gevlokte amandels, gerooster
Glaseersel
- 15 ml gladde appelkooskonfyt
- 45 ml versiersuiker, gesif
Voorverhit die oond tot 180 ºC en smeer ’n groot tertbord met botter. Deeg: Verroom die botter en suiker saam tot lig en klits die eiergele by. Sif die koekmeel, bakpoeier en sout oor en maak aan tot ’n deeg vorm. Laat rus die deeg vir ’n rukkie in die yskas. Sny twee derdes van die deeg af en druk dit op die boom en teen die kante van die tertbord vas. Verkoel tot benodig. Bedek die orige stukkie deeg met kleefplastiek en verkoel ook.
Vulsel:
Verhit die appelwiggies, suiker en kaneel met ’n klein bietjie water tot kookpunt en prut tot net-net gaar en die water alles weggekook is. Meng die geroosterde amandels met die appelstukke en skep die vulsel in die uitgevoerde tertbak. Rol die orige stukkie deeg op ’n meelbestrooide oppervlak uit en bedek die vulsel daarmee.
Bak vir ongeveer 35 minute of tot die deeg goudbruin en gaar is. Laat die tert effens afkoel. Meng die appelkooskonfyt en versiersuiker goed saam tot glad en smeer ’n dun lagie daarvan oor die tert. Laat staan vir 15 minute en sit voor met geklopte room.
Lewer 12 porsies.
Teken HIER in vir ons kosnuusbrief en ontvang elke twee weke 'n gratis nuusbrief met heerlike resepte en artikels.
