Dit is nie oëverblindery of slim foto-redigering nie, wat jy op die foto hier bo sien is werklik ’n BMW-dubbelkajuitbakkie.
Studente wat onderskeidelik in die Duitse maatskappy se bakwerk- en megatroniese afdeling vakmanskapopleiding ontvang, het oor die afgelope tien maande hierdie bakkie in die geheim ontwikkel. Die X7-dubbelkajuit is gebou op BMW se grootste onderstel en is ’n tamaai voertuig, wat 5,3 m meet van voor na agter.
Die ombouing van ’n reuse-veldwa na ’n dubbelkajuitbakkie beteken dat die dak veel korter is as ’n gewone vyfdeur-X7, en daar is ook minder glas en metaal in die bakkie se bakverhouding. Gevolglik is dié bakkie 200 kg ligter as ’n gewone X7-veldwa.
Die meeste van die onderdele en nuwe bakpanele is gebou met die jongste 3D-drukvormtegnologie. Van die opvallendste veranderings is ’n rolstaafstruktuur agter die kajuit en ’n laaibak waarin jy nooit dieseldromme of doringboomtakke sal wil laai nie.
Die bakkie het ’n peperduur kiaathoutlaairuimte, wat enige skrynwerker sal beïndruk. Die laaibak is ook indrukwekkend groot, met ’n lengte van 1,4 m, wat gerek kan word tot 2 m as die laaiklap oopgemaak word. Dit is ook nie per ongeluk groot genoeg vir een van BMW se avontuurmotorfietse nie!
Die aandrywing vir die bakkie is nie soos verwag nie. Mercedes en VW se bakkies is almal diesel, maar ten spyte van die X7-reeks se kragtige 3 liter-turbodieselenjin het BMW se bouspan eerder op ’n petrolenjin besluit.
Gevolglik word die X7-dubbelkajuit aangedryf deur ’n 3 liter-turbopetrolkragbron wat 250 kW lewer. ’n Outomatiese agtgangratkas skakel 450 N.m wringkrag na al vier wiele en verrigting behoort flink te wees.
BMW se amptelike uitgangspunt met die X7-dubbelkajuit is dat dit slegs ’n studenteprojek is, met geen onmiddellike bouplanne nie. Tog meld die Duitse voertuigvervaardiger ook dat sy reuse-weeldebakkie aan alle produksie- en padwaardigheidsreëls voldoen.
Met Mercedes se X-klas op die mark blyk dit dus dat BMW dalk begin planne beraam vir ’n dubbelkajuit van sy eie!
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe. Volg ons op WhatsApp om daaglikse landbounuus op jou selfoon te ontvang.
