Die nuwe X7 is 5 150 mm lank, wat oorgenoeg sitplek vir sewe volwassenes bied – in besonderse weelde.
Geskep as ’n mededinger vir Mercedes-Benz se GLS en die Britse Range Rover, is die X7 die eerste sewesitplek-veldvoertuig uit die BMW-stal. Dit is gemik op ontluikende markte met groot ooptes en Amerikaanse kopers, waar parkering nie ’n beperking vir so ’n oorweldigende voertuig is nie.
Die X7 is BMW se mees gewaagde ontwerp in jare en gee ’n voorsmakie van hoe toekomstige veldvoertuie van dié Duitse vervaardiger kan lyk. ’n Majestieuse sierrooster anker die X7 se vooraansig, met 22 duim-wiele wat die syaansig vervolmaak.
Binne is daar ruimte vir sewe passasiers en ’n oorvloed van die jongste tegnologie en hulpmiddels. Al die sitplekke het elektriese verstellings. Die laairuimte is outomaties en die agterdeur vou in twee dele uit, met die onderkant wat ’n sitplek bied as jy langs die pad wil uitspan, terwyl die boonste helfte skadu daaroor gooi. Hierdie tweedeel-laaideur was nog altyd ’n kernontwerp van Land Rover se luukse veldvoertuie. BMW het beslis gesien hoe prakties dit kan wees en dit sy eie gemaak met die X7.
Om die bestuurservaring te vergemaklik, kan alle inligting en vermaakstelsels slegs met iemand se stem beheer word, wat beteken dat daar nie onnodig hande van die stuurwiel of oë van die pad gedwing hoef te word nie. Die X7 het ook ? vollengte- panoramiese glasdak. Diá dak sorg vir ’n oorvloed natuurlike lig, wat ook ’n gevoel van ruimte skep.
Vir Europese kopers, waar dit hoofsaaklik bewolk is, maak die glasdak sin. In Suid-Afrika sal dit meestal toe gehou word omdat plaaslike bestraling veels te sterk is. ’n Voordeel van die glasdak wat wel kan aftrek kry in Suid-Afrika, is om in die aand deur die Karoo te toer met die glasdak se skerm teruggetrek om só ’n hemelruim vol sterre te kan besigtig.
BMW beoog om teen volgende Maart met X7-verkope te begin. Die plaaslike reeks sal uit twee modelle bestaan: ’n xDrive30d en verrigtingsryke M50d. Albei X7’s word deur dieselfde kragbron aangedryf – BMW se gerekende 3 liter-gelidses-turbodiesel. Die verskil is dat die X50d vier turboaanjaers het, wat sorg vir ’n allemintige 294 kW drywing en 760 N.m wringkrag, terwyl die rustiger xDive30d 195kW en 620 N.m lewer.
Alle X7’s is vierwielaangedrewe en wissel ratte deur ZF se gerekende agtgang- outomatiese ratkas. As lang pad toer jou mikpunt is, sal die xDrive30s se suiniger verbruik – slegs 7 liter/100 km – vir jou aanloklik wees. Vir X7 kopers wat meer ingestel is op verrigting, is die M50d se vermoë om binne 5,4 sekondes van 0-100 km/h te versnel, meer sinvol.
Moe nie onder die indruk verkeer dat X7 slegs ’n weelderige stadsvoertuig met sewe sitplekke is nie. BMW sal dieselfde veldryhulpmiddels wat by die nuwe X5 aangebied word, vir X7-kopers beskikbaar stel. Dit sluit in 80 mm se hoogteverstelling deur middel van ’n lugvering stelsel, wat die X7 se bakrol in toom behoort te hou teen hoë snelhede en ook ritgemak kan bied op die strafste grondpaaie. Gevorderde elektroniese kloubeheerstelsels wat kan onderskei tussen sand, sneeu, modder en rotse, help ook om die X7 met selfvertroue te laat verken ver van die gewone teerpadroetes af.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
