Dit is ’n dubbelkajuitbakkie met ’n viersilinderenjin wat sessilinderkrag opwek. Kortom, ’n Hilux 2.8-dubbelkajuit wat 165 kW en 550 Nm pleks van 150 kW en 500 Nm lewer. En aansienlik beter hantering op grondpaaie danksy beter kronkelvere en gevorderde skokbrekers.
Hoewel die Hilux GR-S slegs ’n paar maande op die mark is, spog ons krieket- en vleismarkaartsvyand, Australië, met ’n soortgelyke model wat nog aantrekliker is. As jy ’n krieket- en Toyota-aanhanger is, moet liefs nie verder lees nie, want die Australiese GR-S gaan jou Hilux-jaloesie laat opvlam.
Voorkoms is altyd ’n saak van voorkeur, maar die huidige Hilux-sierrooster is nie die aansienlikste neusontwerp wat al ooit op ’n Toyota-bakkie was nie. En nou kom ons Australiese vriende in die prentjie. Want hul 2023-modeljaar Hilux GR-S het ’n ander neusontwerp – en dit is nie al nie.
Die Australiese Hilux GR-S se wielboë is groter en breër as die weergawe wat jy by jou plaaslike handelaar kan bestel. Hoekom? Omdat die Australiese mark breër wielsporing wou hê vir beter hoësnelheidstabiliteit. Veral op sinkplaatpaaie en duinroetes, iets waarvan Australië, net soos Suid-Afrika, ’n oorvloed het.
Kan hierdie opknappings na Suid-Afrika toe kom?
Hoeveel breër staan hierdie 2023 Hilux GR-S op die pad? Die voorste wielsporing is 140 mm meer as ’n standaard-Hilux en op die agteras is daai wiele 155 mm verder uitmekaar. Dit gee die Australiese Hilux GR-S meer houding as enige ander Toyota-dubbelkajuitbakkie.
Soos met alles, is daar ook ’n prys vir die breër wielsporing. Een daarvan is ’n ietwat groter draaisirkel, wat bietjie meer bestuurvaardige verg as jy stad toe pendel vir die besoek aan die groot inkopiesentrum en met jou Hilux GR-S beknopte parkeerplekke moet jag.
Die ander knelpunt met breër wielsporing is verhoogte sywandblootstelling vir bande op rotsagtige 4x4-roetes. Hoe meer jou bande se sywande buitentoe staan, hoe groter is die risiko om ’n sywand te sny teen ’n skerp rotswand wat langs die spoor as ’n hindernis lê en wag.
Mooier voorkoms en meer stabiliteit, maar wat anders kry die Aussies met hul GR-S, wat nie op die plaaslike weergawe beskikbaar is nie? Skyfremme op die agteras, wat ’n redelik beduidende verbetering is op die plaaslike Hilux GR-S se trommels. Daar is ook fris agterste herwinningspunte op die Australiese Hilux GR-S, wat baie nuttig te pas kom wanneer jy minder vaardige 4x4-bakkies uit die moeilikheid moet sleep.
Voel jy in sak en as oor jou plaaslike Hilux GR-S-bestelling omdat die Aussies ons in die krieket vermorsel en nou boonop ’n beter weergawe van Toyota se beste bakkie kry? Jy hoef nie. Hierdie knap weergawe van Toyota se Hilux GR-S bereik eers later vanjaar die Australiese mark. Dit beteken dat ’n dienooreenkomstige opgradering van die plaaslike Hilux GR-S terselfdertyd kan gebeur.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
