Met bakkies wat peperduur geword het, is die kans egter skraal dat jy minder bakkie vir meer dubbelkajuit kan ruil.
Vertrou Toyota om na die boer se redding te kom met ’n aanbieding wat te goed klink om waar te wees. Is ’n Hilux wat minder kos maar meer krag bied oëverblindery? Gewis nie.
Ná ’n lang gewag – pak die skuld op die wêreldwye probleme in die verskaffingsketting en KwaZulu-Natal se vloede – is die Hilux GR-Sport uiteindelik plaaslik te koop. Dit is die kragtigste diesel-Hilux tot dusver en bied Toyota-aanhangers verrigting soos dié van ’n sessilinderenjin.
Die jongste toevoeging tot die Hilux-reeks is nie ’n pronk-bakkie nie. Bakkie-kenners sal onmiddellik opmerk dat die GR-Sport ’n voorbuffer soos die Raider het. Die vorm van die Raider-voorbuffer is minder blootgestel aan bakwerkskade as jy woes wil gaan verken op tegniese veldryroetes.
Die gewone poetsing van die voorkoms is aanwesig met GR-kentekens op die sierrooster, laaibakdeur en sypanele. Daar is ook breër wielboë om ’n bietjie meer ruimte te bied vir daardie fris 265/65R17-bande, wat beter ritgehalte en klouvermoë het as die Hilux Legend se 18 duim-bande.
Sessilinderkrag vir Hilux
Dit is egter wat onder die enjinkap sit, wat werklik tel. Toyota se ingenieurs het 15 kW en 50 Nm wringkrag gevind wat binne die Hilux-reeks se 2,8 liter-turbodieselenjin geskuil het.
Met syfers van 165 kW en 550 Nm bied hierdie GR-Sport Hilux skerper versnellerreaksies. As jy gereeld duine of sandveld ry, sal die bykomende krag waarskynlik ’n verskil maak om wielmomentum aan die gang te hou wanneer jy dit die nodigste het. Bakkie-kenners sal ook die datavergelyking raaksien tussen hierdie sterker weergawe van Toyota se 2,8 liter-enjin en die oorspronklike Amarok met die 3 liter-V6-enjin wat ook 165 kW gelewer het.
Normaalweg gaan jy nie die bykomende krag ervaar nie. Ten spyte van die ekstra krag bereik die Hilux GR-Sport 0-100 km/h slegs 0,65 sekondes vinniger as ’n “gewone” 2,8 liter-Hilux.
Iets wat jy wel sal voel wanneer jy ’n GR-Sport bestuur, is die ritgehalte. Toyota se kenners het beter skokbrekers en kronkelvere aangebring en die gevolg is ’n sagter ritgehalte en minder senuagtigheid teen hoë snelhede op sinkplaatpaaie.
Meer krag en beter hantering op grondpaaie vir minder geld? Kan dit wees? Teen R865 400 is die nuwe GR-Sport R40 500 duurder as ’n Hilux Legend, maar goedkoper as drie Legend RS-weergawes, met die duurste een wat R917 900 kos. En nie een van daardie drie Legend RS-weergawes het die GR-Sport se 165 kW-enjin nie.
Met 17 duim-bande wat meer slaggatbestand is en beter veldrytaaiheid bied, meer enjinkrag en ’n minder kwesbare voorbuffer is die GR-Sport ongetwyfeld die waardebakkie vir Hilux-kopers wat haastig is. Of gereeld laat is vir die veiling.
