Die Tesourie het ‘n versoek geweier vir die kwytskelding van dubbelbak- en kleiner bakkies van die nuwe koolstofbelasting wat op 1 September inskop.
Luidens ‘n berig op Engineering News Daily word verwag dat dié belasting die pryse van nuwe voertuie met sowat 2,5% sal verhoog.
Die voertuigbedryf en die Tesourie het die afgelope tyd koppe gestamp oor die toepassing van dié belasting op veral kleiner bakkies, want volgens die bedryf is geen statistiek beskikbaar vir die vrystelling van koolsuurgas deur ligte kommersiële voertuie nie. Die bedryf meen die belasting moet slegs op die passasiersvoertuigmark van toepassing wees.
Intussen het die SA Landboumasjinerie-assosiasie (SAAMA) aan Landbou.com bevestig dat dié belasting nie op landbouvoertuie soos trekkers en vragmotors van toepassing sal wees nie. “Ons het met die Suid-Afrikaanse Buro vir Standaarde (SABS) geskakel, en hulle het bevestig dat die belasting net op passasiersvoertuie ingestel gaan word,” sê mnr. Leon Pretorius, die voorsitter van die SAAMA.
Statistiek vir alle voertuie beskikbaar
“Dit was nog altyd die voorneme dat die definisie van passasiersvoertuie, dubbelbak en klein bakkies sou insluit, aangesien hulle gereeld as passasiersvoertuie gebruik word,” sê die Tesourie.
“Aangesien die meeste enkelbak-bakkies en hul dubbelbak eweknieë dieselfde enjingroottes het, behoort die twee kategorieë dieselfde hanteer te word rakende die toepassing van die belasting. Teen dié agtergrond kan die versoek van die bedryf om dubbelbak- en klein bakkies van die belasting vry te stel, nie aanvaar word nie,” verduidelik die Tesourie.
Rede vir die belasting
Volgens die Tesourie word die belasting ingestel om die gebruik van voertuie met hoë koolstofvrystelling te ontmoedig. Die belasting behoort die gebruik van kleiner voertuie met laer vrystelling te bevoordeel.
Die belasting sal na verwagting in die 2010/’11 boekjaar R450 miljoen vir die staat inwin. Voertuie wat minder as 120g/km koolstof vrystel sal nie belas word nie. Motors en bakkies wat meer as dit vrystel sal R75g/km wat dit ekstra vrystel belas word.
Dít kan die prys van ‘n klein motor met R1 500 opstoot, terwyl dit die prys van ‘n V8-viertrekvoertuig met tot R19 000 kan verhoog.
Die belasting behoort op die prysstaat van die voertuighandelaar te verskyn en ‘n deel daarvan sal na verwagting by die voertuig se prys ingesluit word.
4 Augustus 2010
