Toyota het sy nuutste weergawe van die agtste geslag Toyota Hilux bekend gestel en Ford Ranger-eienaars het rede om hartseer te wees.
Met rekordverkope maand ná maand is daar min aansporing vir Toyota om te peuter met die Hilux se wenresep. Sedert die huidige Hilux in 2016 plaaslik bekend gestel is, oorheers dit Suid-Afrika se bakkiemark.
Tog rus Toyota nie op die louere van Hilux se welslae nie en ’n versameling voorkoms- en tegniese verbeterings is aan dié wêreldbekende reeks bakkies aangebring.
Die opgeknapte Hilux het ’n nuwe sierrooster en kopligte wat sterk herinner aan Toyota se Tacomabakkie, wat gewild is onder Amerikaanse kopers. Beter beligting is altyd ’n pluspunt vir bakkiekopers wat snags op die platteland ry en ongelukke wil vermy.
LED-agterligte sal ook ’n groot voordeel inhou vir Hilux-bestuurders in ’n konvooi, waar digte Afrika-stof dit onmoontlik kan maak om dowwer voertuigligte te herken en volg.
Verbeteringe aan die binneruim is gering, maar boere wat getrou hul slimfone koppel wanneer hulle bestuur, sal bly wees dat beide Android Auto en Apple CarPlay nou deel van die Hilux se inligting-en-mediastelsel is.
Verreweg die grootste nuus met hierdie nuwe Hilux is onder die enjinkap. Toyota se dieselingenieurs het meer krag en wringkrag uit die beproefde 2,8 liter-viersilinderenjin getoor. Kraglewering styg van 130 kW tot 150 kW, terwyl wringkrag nou by 500 Nm staan vir bakkies met die outomatiese sesgangratkas. As jy ’n sesganghandrat kies, val daardie wringkragsyfer tot 420 Nm.
Toyota het ook die 2,8 liter-enjin se luierspoed aangepas, van 850 r/min. tot 680 r/min. Die voordeel hiervan? Meer wringkrag teen die laagste moontlike Hilux-kruipspoed, wat voordelig is wanneer hoogs tegniese veldryhindernisse aangedurf word. Dieselverbruik is ook 11% laer as met die 130 kW-enjin, ten spyte van die nuwe 2,8 liter se sterker verrigting.
Met ’n sterker enjin het Hilux se sleepvermoë verbeter met 300 kg tot 3 500 kg. Toyota het waarskynlik ’n uitklophou geplant in die bakkietweestryd met Ford. Die Ranger het sedert verlede jaar ’n beduidende krag- en sleepvoordeel gehad, wat nou uitgewis is.
Grondpad-ritgehalte is nog ’n ontwerpbeginsel waaraan Toyota se gedugte Hilux-ingenieurs baie tyd en geld bestee het. Beter skokbrekers en ’n minder stram veringstelsel belowe ’n sagter en meer voorspelbare rit op rowwe grondpaaie.
Toyota Suid-Afrika het nog nie ’n intreedatum vir die nuwe Hilux bekend gemaak nie, maar wanneer die opgeknapte weergawe (na raming vroeg in 2021) plaaslik beskikbaar word, sal handelaars na verwagting nie kan voorbly nie.
Landbouweekblad is steeds beskikbaar op winkelrakke, terwyl sake by https://t.co/J5CsarOmv3 en @landbouweekliks vlot verloop. Lees hier wat jou te doen staan indien jy sukkel om die tydskrif in die hande te kry én hoe jy digitaal kan lees. https://t.co/Ug6tJEMNfl
— landbou.com (@landbou) May 12, 2020
